لو انت صاحب شركة ويعتبر اول مره تتعامل مع إعلانات الفيس بوك علشان تسوق لشركتك على الفيس بوك. اول سؤال يجي في بالك هو ما هى أسعار إعلانات الفيس بوك ؟
وطبعاً سألت شركات تسويق كتير او متخصصين فى التسويق الإلكترونى وكانت الإجابة ديماً:
“تعتمد على”
وبالنسبة ليك كا صاحب شركة تحتاج إجابة مفصلة اكتر من كدة بكتير علشان تقدر تحدد اهدافك والميزانية التى سوف تساعدك فى تحقيق اهدافك.
انا النهاردة هجاوب على السؤال ده بشكل مفصل ولية ديماً الشركات والمتخصصين تكون إجابتهم “تعتمد على”
الفيس بوك بيقولك انت ممكن تعلن عندى بأى سعر او بأي ميزانية، فى ناس ممكن تصرف على كباية قهوة اكتر ما تصرف على إعلانات الفيس بوك.
طب والكلام دة معناه اية ؟
معناه انك ممكن تعمل إعلان ب 1$ يومياً و ممكن تعمل إعلان ب 100$ يومياً.
طب وهل هيبقى فى فرق ؟
طبعاً هيفرق معاك فى النتيجة يعنى لو انت هتدفع 1$ متتوقعش انك هتوصل ل 100,000 واحد مثلاً.
أو هيجيلك مكالمات كتير وتفاعل كتيررر مثلاً زى الوعود الوهمية اللى ممكن تسمعها من معظم الشركات.
فا الفيس بوك بيقولك انت هتقولى عايز تدفع ميزانية كام يومياُ وانا اقولك النتائج المتوقعه الى ممكن تحصل عليها.
يعنى مثلاً انت دلوقتى عايز تجرب ب 1$ يومياً وعايز تعرف هوصل لكام واحد ومعدل الزيارات اللى هتيجى للموقع بتاعي.
هتقدر تعرف وانت بتعمل الإعلان زى ما انا موضح فى الصورة كدة:
والخطوة دى تعتبر من ضمن خطوات إنشاء إعلانات الفيس بوك وهتقدر تعرفها من خلال المقال ده:
إعلانات الفيس بوك – دليلك الشامل لإنشاء إعلانات ناجحة
هيجى كذا سؤال فى بالك دلوقتى وهو ازاى الفيس بوك بيتوقع النتائج ؟ طب انا ادفع كام علشان اقدر اوصل لهدفي ؟
وعلشان تعرف إجابة الاسئلة دى لازم تفهم الأول:
أنواع تكاليف او أسعار إعلانات الفيس بوك، معرفة كيف يعمل نظام المزايدة في الفيس بوك و العوامل التى تؤثر على أسعار إعلانات الفيس بوك.
وبعد ماتفهم الثلاث نقاط هتقدر بعدها تحدد تكلفة إعلانات الفيسبوك المناسب لشركتك وأهدافك.
الفهرس
اولاً – أنواع تكاليف او أسعار إعلانات الفيس بوك
زى ما قولتلك قبل كده انك ممكن تدفع 1$ فى يوم وممكن تدفع 100$ او 1000$ فى اليوم عادى مفيش حدود.
وبناءاً على الميزانية اليومية الفيسبوك هيحاول بشكل كبير علشان يجيبلك أفضل نتائج ممكنة.
ولكن ما هي أنواع التكاليف ؟
اول نوع وهو تكلفة الحملة كا كل ودى معناها اية بقى ؟
معناها انك بتقول للفيس بوك أنا عايز ادفع 10$ فى اليوم بس ومش عايز الميزانية اليومية اكتر من كدة.
وممكن تقول كمان للفيس بوك انا عايز اعمل حملة لمدة 5 ايام والتكلفة هتكون 20$ وانت بقى بتظبطها على ال 5 ايام.
ملحوظة:- لو الميزانية قليلة هتلاقى الفيس بوك بيقولك زود الميزانية شوية من 20$ الى 30$ علشان تكون النتائج كويسة كما موضح فى الصورة.و هيقولك كدة لو هو شايف ان الميزانية قليلة على عدد الأيام.
النوع الثانى وهو التكلفة بالنتيجة الواحدة و دى معناها اية ؟
انت دلوقتى هدفك من الحملة انك تحصل على تفاعل على منشور معين على صفحتك.
وبعد ما الإعلان يبداء ويحصل تفاعل هتلاقى كدة الفيس بوك بيقولك تكلفة التفاعل الواحد على الإعلان بتاعك.
والخلاصة أنك بتحدد التكلفة كاكل للحملة الإعلانية وتقدر تعرف التكلفة متقسمة ازاى بناءاً على التكلفة بالتفاعل الواحد.
بس انت هتسأل نفسك ليه الفيسبوك عامل نوعين من التكلفة ؟
الإجابة على السؤال دة هتودينا للنقطة الثانية وهي نظام المزايدة خلينا نعرفها مع بعض.
ثانياً – كيف يعمل نظام المزايدة في الفيس بوك لتحديد أسعار إعلانات الفيس بوك
وانت دلوقتى بتفكر ازاى تعمل إعلانات على الفيس بوك لشركتك. فى اصحاب شركات كتير فى نفس مجالك بيفكروا نفس تفكيرك.
وفى منهم اللى بدأ بالفعل وفى منهم اللى بيحضر.
فانت لازم تبقى عارف انك داخل تنافس الشركات الاخرى على منصة الفيس بوك.
علشان كده الفيس بوك عمل نظام المزايدة للإعلانات.
والنظام ده معمول علشان الفيس بوك يضمن أن المحتوى اللى هيوصل لمستخدمى الفيس بوك عالى الجودة وانوا هيضيف قيمة ليهم.
علشان كدة تكلفة الإعلانات تختلف من مجال شركة إلى أخرى على حسب حجم المنافسة.
والنظام دة مش فى الفيس بوك دة يعتبر فى كل منصات التسويق الإلكترونى زى إعلانات جوجل ادوردز.
والنظام دة يحتوى على عوامل كتير علشان الفيس بوك يقيم بها الإعلانات.
وهى هدف الحملة، من الجمهور المستهدف، الميزانية، جودة الإعلان واخيراَ مجال شركتك.
والعوامل دى بقى هتودينا للنقطة الثالثة الى هنشرح فيها كل عامل لوحدة وازاى يؤثر على تكلفة الإعلان.
ثالثاً – العوامل التى تؤثر على أسعار إعلانات الفيس بوك.
1- هدف الحملة
تعتبر أول خطوة في إنشاء إعلانات على الفيسبوك وكمان تعتبر من أهم الخطوات ولكن لماذا ؟
لإن بناءاً على الهدف الفيس بوك بيوصل إعلانك للأشخاص أكثر قابلية لتحقيق هدف الحملة.
يعنى على سبيل المثال لو عايز زيارات لموقعك على الإنترنت، الفيس بوك هيوصل إعلانك للناس اللى تحقق الهدف ده.
وطبعاً حجم المنافسة بيختلف من هدف إلى آخر فبالتالى تكلفة إعلانات الفيسبوك هتختلف من هدف إلى آخر.
على سبيل المثال فى مجال العقارات فى مصر يعتمد بشكل كبير جداً على هدف توليد عملاء محتملين lead generation
وبالتالى تكلفة الهدف ده بيكون اكثر من الأهداف الأخرى.
2- الجمهور المستهدف
عزيزى القارئ اختيار الشركات الاخرى فى نفس مجالك نفس الجمهور المستهدف.
هيأثر بشكل كبير على تكلفة إعلانات الفيسبوك لان المنافسه هتكون اكبر.
3- اختيار نظام المزايدة
فاكر أنواع التكاليف اللى اتكلمنا عنها ؟
طب فاكر النوع الثانى وهو التكلفة بالنتيجة ؟
الفيس بوك بقى بيستخدم التكلفة بالنتيجة فى نظام المزايدة وبيديك الاختيار انك تحددها بنفسك يعنى بتقول للفيس بوك أنا عايز التكلفة بالنتيجة “بالنقرات كما موضح فى الصورة” تكون 0.50 مثلاً مهما كانت المنافسة.
او بتقول للفيس بوك انا هسيبها automatic وانت تحددها بناءاً على حجم المنافسة.
4- جودة الإعلان
الفيس بوك حاطط 3 معايير لتقييم جودة الإعلان وهما
Engagement Ranking, Quality Ranking, and Conversion Ranking.
ولو حصلت على درجة قليلة فى اى معيار هيأثر فى تكلفة الإعلان.
5- مجال العمل
واخيراً مجال شركتك هيأثر فى تكلفة إعلانات الفيسبوك لإن كل ما كانت المنافسة قوية فى مجالك، كل ما التكلفة هتكون غالية.
وعلى العكس كل ما المنافسة ضعيفة، كل ما تكلفة الإعلان هتكون رخيصة.
بكدة عزيزي القارئ عرفت ليه الإجابة ديم بتكون “تعتمد على”
وهتقدر تحدد أسعار إعلانات الفيس بوك الخاصة بمجال شركتك واهدافك.
3 Comments
أتمنى ان تنشرو اكثر عن مثل هده مقالات ومؤشرات فيسبوك ادز واستراتيجيات
ان شاء الله حضرتك بس ممكن تسجل فى النشرة الإخبارية وهيتم ارسال كل ما هو جديد لحضرتك.
شكراً.
مقال جيد