اختيار الكلمات المفتاحية في جوجل ادوردز يعتبر أهم خطوة من خطوات التسويق عبر محركات البحث لأنها تعتبر الأساس ومن غيرها الإعلان مش هيظهر للعملاء المحتملين.
علشان كدة فى هذا المقال هقولك على 4 خطوات علشان تختار افضل كلمات مفتاحية و ازاى تستخدمهم فى المجموعات الإعلانية Ad Groups.
الفهرس
اول خطوة – اختيار الكلمات المفتاحية فى ادوردز
فى الخطوة دى انت بتبحث على الكلمات المفتاحية اللي عايز تنافس عليها.
بس السؤال هنا هل اختار اى كلمة لها علاقة بمجالى ؟
يعنى مثلاً لو انا صاحب شركة عقارات اختار كلمة عقارات انافس عليها ؟
لا طبعاً مينفعش لإن الكلمة broad جداً وصعب جداً تحدد نية الباحث من خلالها.
يعنى متعرفش هل هو مثلاً بيدور على شركة عقارات ؟
ولا هو عنده شقة او عمارة وعايز يبعها ؟
ولا هو صاحب شركة عقارات وبيدور على شركة تسويق عقارى ؟
طب انت اكيد بتسأل نفسك سؤال دلوقتى هل فى عوامل معينة اقدر امشى عليها وانا بختار الكلمات ؟
اه طبعاً وهقولك علي 5 عوامل تمشي عليها علشان تختار افضل كلمات تنافس عليها فى إعلانات جوجل ادوردز.
1- استخدم Long Tail Keywords فى إعلانات قوقل ادوردز
ركز على long tail keywords وهي كلمة مكونة من ثلاثة كلمات زى مثلاً “شركة عقارات بالقاهرة”
طب اشمعنى long tail keywords ؟
علشان بتكون كلمة مستهدفة وبتبقى عارف نية الباحث فا بتبقى متأكد ان النقارات هتكون مناسبة على الإعلان بتاعك.
فا بالتالى هتحصل على عملاء بشكل أسرع.
2- اختار الكلمات التجارية Commercial keywords
هى عبارة عن كلمات بتكون فيها نية الشراء والكلمات دى بتحتوى على شراء، اسعار، تخفيضات، زى مثلا “شراء شقة فى مصر” دى تعتبر كلمة تجارية.
3- حجم المنافسة والبحث على الكلمات المفتاحية
حاول تختار الكلمات اللى بيكون عليها معدل بحث عالى وفى نفس الوقت المنافسة عليها مش عالية.
وتقدر تعرف دة من خلال كذا tool زى :
- keyword planner
- ubersuggest
طب هل الكلمات اللي عليها منافسه عالية غلط ؟
لا مش غلط بس ليها استراتيجية معينة يعنى مثلاً لو شركتك لسة جديدة مينفعش انافس على كلمات المنافسة عليها عالية.
بس اقدر استخدمها فى إعادة الاستهداف ودى خاصية متقدمة فى جوجل ادوردز هنتكلم عليها فى مقال تانى لوحده .
4- اختار الكلمات اللي بتحتوي على اسم شركتك Brand name keywords
عايزك تتخيل معايا ان شركتك لسه جديدة ومحتاج تخلى العملاء المحتملين تعرف اسم شركتك.
فا هتقول لمدير التسويق وتسأله اية الحل ؟ هيقولك هنعمل حملات توعية على السوشيال ميديا.
وبعد ما تعمل الحملات والناس تبدأ تعرف اسم شركتك تفتكر الناس دى هتعمل اية ؟
اول حاجة هيروحوا على جوجل علشان يعملوا بحث عن شركتك.
تخيل معايا بقى ان شركتك لسة جديدة ولسة نتائج السيو مش بتظهر فى الاول بتكون على المدى البعيد والعملاء المحتملين يبحثوا باسم شركتك وميلقوش نتائج.
اكيد تخيلت انك خسرت العملاء المحتملين.
علشان كده لازم تعمل ميزانية بإسم شركتك علشان لما حد يبحث عنها فى جوجل تظهر على طول فى نتائج البحث من خلال إعلانات جوجل.
5- اختيار الكلمات الخاصة بأسماء الشركات المنافسة Competitive keywords
الظهور للعملاء اللى بتبحث عن منتجات أو خدمة المنافسين تعتبر استراتيجية مهمة من استراتيجيات ادوردز.
بس خلى بالك فى معظم الأحيان المنافسة على النوع ده من الكلمات بيكون غالى جداً.
ويفضل بردة انك تستخدمها فى إعادة الاستهداف فى البداية.
تانى خطوة – اختيار نوع الكلمات المفتاحية فى ادوردز Keyword match type
بعد ما اخترت الكلمات المفتاحية المناسبة لشركتك ومشيت على الخمس عوامل اللي قولتلك عليها.
هنيجى بقى نحدد انى نوع نستخدمة Match Type.
يعنى اية الكلام دة ؟
جوجل ادوردز بيقولك انا مديك خمس انواع من ال match type تقدر تستخدمهم فى المجموعة الإعلانية Ad group.
يعنى اية بردة ؟
خليني اشرح لك بمثال.
انت دلوقتى من ضمن الكلمات اللي اخترتها افضل شركة عقارات.
لو انت عايز الاعلان بتاعك يظهر للكلمة دى وكمان يظهر ل:
- الكلمات المشابهة
- المرادفات
- الأخطاء الإملائية والمشتقات
- المفرد أو الجمع
- عمليات البحث ذات الصلة
فا بتستخدم نوع اسمه Broad Match type وهتتكتب فى المجموعة الإعلانية بالشكل دة زى ما انا موضح فى الصورة كدة.
ولو انت عايز الاعلان بتاعك يظهر للكلمات المشابهة فقط والمرادفات هتختار نوع اسمة Broad Match Modifier والرمز بتاعها +.
و هتكون بالشكل دة +افضل +شركة +عقارات.
ولو بقى عايز الإعلان يظهر للكلمة دى بس (افضل شركة عقارات) ومش عايز مرادفات أو كلمات مشابهة للكلمة الإساسية بس مفيش مانع من كلمة قبل أو كلمة بعد.
هتختار نوع اسمة Phrase match type والرمز بتاعها ” ” وتستخدم بالطريقة دى “افضل شركة عقارات”.
اما بقى لو انت عايز تظهر للكمة الاساسية بس ومش عايز لا كلمة قبل أو كلمة بعد او حتى المرادفات او الكلمات المشابهة هتختار نوع اسمة Exact match.
والرمز بتاعها [ ] وتستخدم بالطريقة دى [افضل شركة عقارات].
اخر نوع بقى وهو ال negative keywords هنتكلم عليه فى الخطوة اللى جاية.
طب انت بقى تختار انهى نوع ؟
حاول تبعد عن Broad match type وركز أكثر على phrase match and broad match modifier.
طيب لو انا استخدمت broad match غلط ؟
لا مش غلط بس يفضل تستخدمها فى حملات التوعية awareness ولازم يكون عندك الخبره فى إعلانات إعادة الإستهداف e-marketing ads علشان تقدر تستهدف الناس اللى دخلت على الموقع بتاعك وخرجت.
تالت خطوة – استخدام Negative keywords
بعد ما جمعت الكلمات اللي حابب تنافس عليها واخترت النوع كمان. هنيجى بقى لنقطة مهمة جداً ممكن تخلى الإعلان ميشتغلش كويس.
معقولة بعد كل دة ؟
ايوة زى ما انا بقولك كدة.
طب ليه يا اشرف ؟
بص يا صديقى عايزك تتخيل معايا انك بتنافس على الكلمة دى “شركة تسويق الكتروني” ونوعها Phrase match.
فا زى ما قولنا قبل كدة ان الإعلان بتاعك هيظهر للكلمة دى و اى كلمة قبلها او بعدها.
يعنى لو حد كتب إنشاء شركة تسويق الكتروني فى محرك البحث إعلانك هيظهر وطبعاً اللي هيستخدم الكلمة دى عايز يعمل شركة مش عايز شركة تسويق الكترونى.
والنتائج المترتبة على كدة انك هتصرف فلوس على irrelevant clicks وة هيخليك تصرف فلوس على الفاضى.
طب وايه الحل يا اشرف ؟
الحل انك تستخدم Negative keywords ودى معناها انك بتقول لجوجل ادوردز انا مش عايز يظهر الإعلان بتاعى لكلمات معينة زى كلمة إنشاء او مجاناً على سبيل المثال.
طب استخدمها ازاى ؟
بسيطة هتستخدم الرمز بتاعها وهو – وهتستخدمها بالطريقة دى -إنشاء زى ما انا موضح فى الصورة كدة.
ملحوظة:- انت ممكن تستخدم الـ Negative keywords فى الحملة كا كل مش لازم فى كل مجموعة إعلانية وكدة افضل علشان تمنع كل الإعلانات من الظهور للكلمات الغلط.
الخطوة الأخيرة – إنشاء مجموعات إعلانية مستهدفة
قبل ما تبدأ الخطوة دى لازم تعرف الأول ازاى تظبط إعدادت الحملة بشكل محترف وتقدر تعرفها من هذا المقال: جوجل ادز – 4 نصائح للحصول على افضل نتائج من إعلانات جوجل.
نيجى بقى لأخر خطوة وهى تجميع الكلمات المفتاحية فى المجموعات الإعلانية Ad Groups.
بس مش صح اللي بيدور فى بالك وهو تجميع كل الكلمات فى مجموعة إعلانية واحدة.
طب ليه مش صح ؟
لأن النتيجة ستكون سيئة جداً زى مثلاً :-
- ارتفاع تكلفة النقرة لكل كلمة.
- نقاط الجودة فى جوجل ادورد هتكون ضعيف جدا.
- نسبة عدد العملاء المحتملين سوف تقل.
- بنسبة كبيرة لن يظهر إعلانك.
طب والحل ايه ؟
إنشاء مجموعات إعلانية مستهدفة في حملة واحدة على سبيل المثال.
خلينا ناخد مثال تانى غير العقارات وعايزك دلوقتى تتخيل نفسك صاحب شركة تسويق الكترونى.
وعايز تقسم الكلمات المفتاحية الى مجموعات إعلانية مستهدفة طب ازاى ؟
أولا سوف تقوم بتجميع الكلمات المفتاحية المتشابهة على سبيل المثال
بعد كدة سوف تقوم بأنشاء مجموعة إعلانية لكل جروب زى ما انا موضح فى الصورة.
ملحوظة مهمة :- عدد الكلمات لكل مجموعة إعلانية يجب أن يتراوح مابين 5 إلى 20 كلمة بحد اقصى.
وبكدة انت دلوقتى تقدر تختار افضل الكلمات المفتاحية وازاى تستخدمها فى قوقل ادوردز (ادز).
